يعنى ايه تسويق رقمى

تكنو مصر للبرمجيات

يعنى ايه تسويق رقمى – Digital Marketing

Mohamed Sultan
الأحد 11 أكتوبر, 2015
0
0

يعنى ايه Digital Marketing

الـDigital Marketing او التسويق الرقمى هو تسويق المنتج أو الخدمة اللى بتقدمها بس مش بالطريقة التقليدية للتسويق بطريقة Digital ، الفرق بين التسويق الرقمى و التسويق الأرضى كبير سواء فى تجهيز الخطة التسويقية أو فى النتائج .

الفرق بين التسويق الرقمى و التسويق العادى هى الأدوات المستخدمة ، فى التسويق الرقمى بنستخدم أدوات أونلاين أهمها الموقع الإلكترونى لشركتك أو صفحة الشركة على الفيس بوك أو جوجل بلس و غيرهم من مواقع التواصل الإجتماعى ، أما التسويق الأرضى أو التسويق الأوفلاين بيكون عن طريق أدوات أوفلاين زى ( البروشور ، الفلاير ، البانر …..إلخ ) .

طب ليه تستخدم التسويق الرقمى – Digital Marketing

فى الفترة الأخيرة زادت الثورة التكنولوجية و كل بيت فى مصر بقى عنده انترنت و بيستخدم مواقع كتير يومياً أهمها Google و Facebook ، و دى كانت فرصة كبيرة للشركات إنها تفرض نفسها على السوق و على الأماكن المحتمل الوصول للعملاء من خلالها و بالتالى بدأ ينتشر مفهوم التسويق الرقمى عند الشركات بمختلف مجالاتها .

ليه تستخدم تسويق رقمى لشركتك !!

نفترض إن فى شركتين تسويق عقارى مقرهم فى الزقازيق و حالياً الشركتين بيسوقوا لمجموعة شاليهات فى الساحل الشمالى شركة (X) و شركة (Y) .

الحالة الأولى شركة (X)

فى إستراتيجية التسويق للشاليهات شركة (X) قررت طبع عدد كبير من البروشور و الفلاير و وزعتها فى أماكن مختلفة فى الزقازيق ( مكان مقر الشركة ) و القاهرة ( كسوق مستهدف للوصول لعملاء ) مع عمل بانر كبير على عدد من الكبارى و الأماكن الحيوية .

بالنسبة للعملاء المحتملين ( الناس اللى شافوا الإعلان )

الفئة المستهدفة فى الزقازيق قليل منهم هيكون مهتم بشراء شاليه فى الساحل الشمالى .
أما الفئة المستهدفة فى القاهرة و فى ( أماكن محددة ) علشان يعرفوا أكتر عن العرض مضطر يتصل تليفونياً أو يروح الزقازيق ! على الرغم إن عنده أكتر من شركة فى القاهرة !
لو العميل المحتمل حابب يعرف أكتر عن الشركة و سابقة الأعمال و مدى المصداقية هيعرف منين !

أما عن نتائج الحملة فى الشركة

الشركة وزعت عدد كبير من الفلاير على عدد كبير لكن مقدرتش تحدد هى وصلت لإيد كام عميل محتمل أو مين إهتم بالإعلان و مين لأ .
مقدرتش تجمع قاعدة عملاء محتملين تقدر تسوقلهم بعد كده .
مقدرتش تعرف رد فعل العميل المحتمل إتجاه الإعلان .

الحالة الثانية شركة (Y)

فى إستراتيجية التسويق للشاليهات شركة (Y) قررت عمل موضوع شامل عن عرض الشاليهات على الموقع الإلكترونى الخاص بالشركة فيه كل المعلومات اللى ممكن يكون محتاجها العميل ، مع عرض صور للشاليه و ربطه بخرائط توضيحية بتوضح مكان الشاليه و بعده عن البحر ، مع عمل إعلان بتستهدف فيه فئة محددة سواء على فيس بوك أو إعلان Google Adward ، بالإضافة لـ بانر كبير بإسم الشركة فى الأماكن الحيوية ( بإسم الشركة مش بالعرض ) للترويج للشركة .

بالنسبة للعملاء المحتملين ( الناس اللى شافوا الموضوع و الإعلان )

قدروا يعرفوا أكتر عن الشركة و مدى مصداقيتها من خلال الموقع الإلكترونى و سابقة الأعمال .
العميل يقدر بأكتر من وسيلة انه يعرف أكتر سواء من خلال بريد الموقع أو رسائل صفحة الشركة .

أما عن نتائج الحملة فى الشركة

الشركة قدرت تعمل إسم و يكون إسمها معروف لناس كتير مش بس العملاء اللى معاك .
من خلال تحليل الحملة الإعلانية الشركة قدرت تعرف عدد العملاء المحتملين و إهتمامتهم .
الشركة قدرت توصل الخدمة اللى بتقدمها لأماكن محددة و سوق مستهدف و تقدر تفتح سوق برا مصر من خلال الأدوات الأونلاين .
و بالتالى إحتمالية زيادة المبيعات كبيرة جداً .