يعنى ايه Inbound Marketing !؟
الـ inbound Marketing مش ليه ترجمه حرفية باللغة العربية ، لكن من خلال المقال ده هنقدر نفهم سوا يعنى ايه إنبوند ماركتنج و ليه تستخدمه .
الإنبوند ماركتنج inbound marketing تعتبر إحدى طرق الـDigital marketing التسويق الرقمى اللى إتكلمنا عنه فى مقال سابق و عن أهميته .
نرجع تانى للـinbound فى مجموعة مقالات على Hubspot بتتلخص فى تعريف الـinbound marketing من خلال مقولة
( IT’S ABOUT CREATING MARKETING THAT PEOPLE LOVE )
سوق بالطريقة اللى يحبها الناس .
فى المقال اللى فات عن الـdigital marketing قولنا ان فى تسويق رقمى ( أونلاين ) بنستخدم فيها أدوات اونلاين من خلال الإنترنت و ان فى تسويق أرضى ( أوفلاين ) بنستخدم فيه أدوات بعيدة عن الإنترنت ،كمان الـتسويق الرقمى أنواع inbound marketing اللى هنتكلم عنه من خلال المقال و outbound marketing و هنوضح الفرق بينهم من خلال مثال بسيط .
نفترض إن فى عيادتين للتجميل عيادة (X) و عيادة (Y) و العيادتين بيستخدموا تسويق رقمى و بنفس الأدوات موقع إلكترونى للعيادة ، صفحة على الفيس بوك ، و نفس الفئة المستهدفة .
الحالة الأولى عيادة (X)
التسويق فى العيادة إعتمد على الطريقة التقليدية للتسويق بس بإستخدام أدوات أونلاين ، موقع العيادة معتمد على أخبار العيادة الأسعار المواعيد و المكان و إعلانات صفحة الفيس بوك إعلانات مباشرة .
- العيادة صرفت إعلانات كتير جداً علشان تقدر تكبر الصفحة و توصل للناس .
- الفئة المستهدفة بتدخل على صفحة العيادة و لو مش مهتمة بتخرج تانى .
- مش كل الناس عرفت العيادة و لا قدرت انها تكون براند الناس تعرفه أو ترشحه لحد .
الحالة الثانية عيادة (Y)
التسويق فى العيادة إعتمد على الـ inbound marketing إزاى بقي !!
- موقع العيادة مش بس إعتمد على تفاصيل الأسعار و المكان و المواعيد ، الموقع عليه مدونة بيتكتب عليها بإستمرار مقالات جديدة عن التجميل و الحفاظ على البشرة و الصحة العامة .
- صفحة الفيس بوك مش بس لإعلانات عروض العيادة ، الصفحة بتقدم نصائح بإستمرار عن التجميل و عن الحفاظ على جمال البشرة و حمايتها .
بالتالى مش كل اللى دخل الصفحة هيروح العيادة أو عنده حاله محتاجه للتجميل ، لكن الاسم بقى معروف و مش إحتاجت وقت أو مصاريف كتير علشان تعلم إسمها فى دماغ الناس ، و قدروا يعملوا جذب للفئة المستهدفة بمحتوياتهم ، و لأن أسرع طريقة للتسويق فى مصر هى ( WOM (word of mouth كلام الناس ، فالتسويق إعتمد على إزاى يخلى الناس تحبهم و تبقى معاهم !!
تحب تكون X و لا Y !!؟