• info@technomasr.com
  • 01097225751 - 0502265598

تكنو مصر للبرمجيات

يعنى ايه فئة مستهدفة – Target Audience

يعنى ايه فئة مستهدفة – Target Audience

يعنى ايه فئة مستهدفة Target Audience

  الفئة المستهدفة ببساطة يعنى إنت ناوى تبيع لمين !!؟  و مين اللى مهتمين بالخدمة أو المنتج اللى بتقدمه ، الفئة المستهدفة لازم تحددها من البداية لأنها من العوامل المهمة اللى بتؤثر فى السوق تأثير مباشر .

 

طب ليه لازم تحددها لما ممكن تستهدف السوق كله و الناس تعرفك كلها زي ما قولنا إنك تعمل براند !!؟

 

نفترض إن فى شركتين سياحة شركة (X)  و شركة (Y) و الشركتين بيسوقوا لرحلات دول شرق اسيا

 

الحالة الأولى شركة (X)  

الشركة قررت تحديد برنامج الرحلة و سعره و سعر البرنامج 5000 جنيه للفرد ، و التسويق هيكون تسويق رقمى و تسويق أرضى ، التسويق الرقمى من خلال صفحة الفيس بوك و الموقع الإلكترونى الخاص بالشركة .

إستهداف الشركة مش محدد عملوا Target لكل الفئات العمرية بكل الطبقات المختلفة ، تم توزيع فلايرز فى الجامعات الحكومية و الخاصة و فى المواصلات و اعلان الفيس بوك الTarget  بتاعه  مصر كلها و زى ما قولنا فئات عمرية غير محددة .

النتيجة

قدر يعمل براند و ناس كتير عرفته فعلا

مش كل مصر هتقدر تطلع رحله بـ5000 جنيه للفرد و بالتالى الناس عرفت و سكتت

مش كل الفئات العمرية  عندها الإمكانية لدفع 5000 جنيه فى رحلة حتى لو منبهر بالعرض

بالتالى

عدد المبيعات كان أقل من المتوقع لأنه صرف كتير على الإعلانات

 

الحالة التانية شركة (Y)

الشركة قررت تحديد برنامج الرحلة و سعره و سعر البرنامج  5000 جنيه للفرد ، و التسويق هيكون تسويق رقمى و تسويق أرضى ، التسويق الرقمى من خلال صفحة الفيس بوك و الموقع الإلكترونى الخاص بالشركة .

إستهداف الشركة كان محدد جداً و إستخدموا إستراتيجية STP

إستراتيجية STP

Segmentation- تقسيم   قسم العملاء المحتملين لشرائح

 

  •  شريحة الشباب

استهدف فيها الشباب فوق سن الـ18 و لحد 25 سنة و مناطق محددة فى القاهرة ( المعادى ، التجمع الخامس ، مدينة نصر )

  • شريحة شهر العسل

استهدف فيها الشباب من سن 22  لسن 35  و وسع دايرة المتاطق شويه و شمل المحافظات

  • شريحة الاستجمام

استهدف فيها رجال الأعمال عموما من سن 30 لـ 50 سنة و ركز فى المناطق على القاهرة الكبرى

 

Targeting – الاستهداف

مرحلة التفكير فى طريقة استهداف كل مرحلة و ازاى يقدر يوصل للعميل اللى هيعمل معاه Deal

Positioning – وضع الشركة بالنسبة للعميل فى السوق

المنافسة كبيرة و لازم تلاقى لنفسك مكان ازاى بقى !!؟ ايه اللى يخلى العميل المحتمل يسيب غيرك و يجيلك !!

الشركة قررت ان الـpositioning بتاعها يكون من خلال العرض نفسه

  • عرض شريحة الشباب

المكان فى وسط البلد حواليهم كل الخدمات اللى ممكن يحتاجوها أو عرض بألعاب رياضيه هناك مخفض التمن

  • عرض شريحة شهر العسل

المكان على البحر أو وسط البلد مع هديه مثلا أو حجز عشاء فى الفندق

  • عرض الاستجمام

مكان على البحر بعيد عن صخب المدينة ، رجال الأعمال مش هيبقى فارق معاهم السعر و لا الهدايا زى ما هيكون فارق معاهم الاستجمام

 

النتيجة

الناس عرفته ( مش كلهم ) بس الفئة المستهدفة و محتمل يكونوا عملاء

قدر يخلى كل شريحة من المستهدفين تحس ان ده العرض بتاعها

بالتالى

قدر يحقق مبيعات بتكلفة أقل

 

براند كبير من غير تحقيق ربح متوقع مش براند

 


التعليقات

اترك تعليقك

لن يتم نشر عنوان بريدك الإلكتروني.